I want to be a vegan.

Gusto kong matutong kumain ng gulay. Pero hindi ko alam kung saan at paano magsisimula. Sinubukan kong kumain ng kalabasa, patatas, sitaw, at cabbage. Ano nga ba tagalong ng cabbage? Pero, ayun nga,  di nag tagal, nasuka ako. Mahirap talaga kapag pinipilit mo ang sarili mong gawin ang mga bagay na ayaw mo.

Sabi nga pala kaibigan ko, repolyo daw ang tagalog ng cabbage.

Ano nga ba ang gusto kong gawin sa buhay ko? Noong bata pa ako, gustong gusto ko ang maging astronaut. Gusto ko makapunta sa moon tulad nina, Neil Armstrong, Roger B. Chaffee, Jim Lovell at iba pa. Isa lang ang mission ko kung bakit gusto ko makapunta sa moon. Ito ay ang makita ang great wall of China. Sabi dun sa librong nabasa ko, kitang kita daw ang mga haligi ng Great wall of China kapag nasa moon ka. Amazing.

Gusto ko din pala maging titser noon. Pangarap ko ang humawak ng chalk at magsulat sa pisara. Ang sarap sa pakiramdam na may nakikinig at may sumusunod sa mga utos mo. Minsan nga eh, nag feeling akong guro sa bahay. Nangupit ako ng chalk sa eskwelahan at inuwi ko ito. Nagsimula akong magsulat sa kahoy na aparador ng nanay ko. Sinulat ko ang mga lectures at notes na nakopya ko sa eskwelahan. Yung mga manika kong naka upo sa kama ang mga estudyante ko. May hawak pa nga akong ruler na pampalo ko sa mga makukulit na bata. Nakakatuwa.

Habang tumatagal, nag iiba ang aking pag iisip at pananaw sa buhay. Habang tumatagal, nagiging Malabo sa akin kung ano talaga ang gusto ko maging sa aking pag tanda. Hindi ko na alam.

Highschool. Hindi ko na iniisip yan. Ang iniisip ko lang, ang makaraos at makatapos ng highschool. Aral, kopyahan, daldalan, lovelife. Maganda ang image ko sa paaralan namin. Syempre, co-ed. Ang mga babae ang matitino at ang mga lalaki ang mga magugulo. Haha, ayos.

Nahuli ako ng ilang mga guro ko na nangongopya noong final exam namin. Pero syempre, dahil maganda nga ang image ko, hindi naniwala yung iba. Beeehlaaat. Kala nyo ha. Pero muntik na ako ma-suspend noon. Talaga namang nangongopya ako e. Mabilis lang talaga ako makaisip ng dahilan para makalusot sa sitwasyon na yun. Kung naniwala sila, tiyak na kick-out ako. Saklap.

Malapit na ako makatapos sa highschool. Kailangan ko na mag-isip ng magandang kurso. Wala, wala ko maisip. Bahala na!

Psychology. Yan ang pinili ko. Di ko alam kung bakit. Gusto ko lang kakaiba. Ayoko ng nursing. Masyadong common. 

Nag-enjoy naman ako sa pinili kong kurso. May kaunting pag aalinlangan lang ako. Gusto ko sana mag masscom, advertising o marketing. Sabi nga nila, mas bagay ako doon. Pero oks nadin psychology. Angas din. Madalas, pag nalalaman ng mga tao na psychology ang kinuha ko, ang unang reaksyon nila “WOOOOOW, i-psycho mo nga ako” o di kaya’y “Anong nababasa mo sa akin?” o kaya “Hulaan mo nga ako”. Mga timang. Di kami manghuhula. Punta kayo sa Quiapo baka dun makahanap pa kayo ng makakaloko sa inyo. Nakakatawa nalang e.

Pero ang pinaka ayokong marinig sa mga tao lalo na sa mga kamag anak ko eh yung “Dapat nag nursing ka nalang”. E kayo nalang kaya mag nursing? Wag ako.

Takot ako sa dugo. Kahit sarili kong dugo, hindi ko kayang tignan.

Minsan nga, nanuod ako ng pelikulang SAW. Paborito ko yun. Pero nandidiri ako sa mga nakikita ko. Mga katawan na iniipit ng dalawang pader, o kaya mga kamay na pinuputol. Sisirit ang dugo, madudurog ang utak, manghihina ang tuhod ko, pipikit, sisigaw ng “tangina kadiri!!!!”

Takot din pala ako sa mga matataas na lugar. Iniisip ko palang, namamawis na ang mga kamay at paa ko. Hinding hindi mo ako mapapasakay sa mga rides ng amusement park. Ikamamatay ko. Kaya, kayo nalang.

Hinding hindi mo ako mapipilit sa bagay na ayaw kong gawin. Ayoko. Isusuka ko. Matanda na ako. Siguro naman naisip mo na, alam ko na ang tama at mali. Alam ko na rin ang pwede at bawal. 22 na pala ako, no? Tanda ko na nga. Pero di ko parin alam ang gusto ko sa buhay.

Gusto kong kumain ng gulay. Saan ako mag sisimula? Nakakasuka kasi yung lasa. Iba iba hindi ko maintindihan. Alam kong masustansya siya. Pero nasanay kaming hindi kumakain ng gulay simula pa noong bata pa kami. Gusto ko yung gerber. Kaso pambata yun e.

Teka, masarap kaya ang kalabasa kapag ginawang shake?